Qabeenya Dhaalatti Makuu/Collation

𝗦𝗘𝗘𝗡𝗦𝗔

Namni tokko akkuma dhalatu du’uun seera uumamaa akkaa ta’e ni beekama. Sirni namni tokko erga du’ee booda qabeenyi isaa ittiin dhaaltota isaatti darbu seera dhaalaa keessatti diriiree jira. Seerri dhaalaa biyya keenya seera hariiroo hawaasaa bara 1952 bahe kitaaba 2ffaa mata duree 5ffaa jalatti kan hammatamee dha. Seerichi akkaataa dhaaltummaan itti banamu, itti qulqullaa’uu fi erga qulqullaa’ee booda dhaaltota dhaaluuf mirga qabaniif itti qoqqoodamu of keessatti hammateera. 

Dhaalchisaan gaafa lubbuun jiru du’a isaa booda eenyu qabeenya isaa keessaa maal fudhachuu akka qabu dhaamoo taasisuu akkasumas kennaa adda addaa kennuu danda’a. Dhimmi har’a irratti hubannoo isiniif uumuu barbaade, dhaalatti makuun (collation) kennaalee kanaan kan wal qabatu yoo ta’u akka itti aanutti kan dhiyaatu ta’a. 

𝗠𝗔𝗔𝗟𝗨𝗠𝗠𝗔𝗔

Dhaalatti makuun ibsa gabaabaadhaan qabeenya dhaaltuun tokko kennaadhaan dhalchisaa irraa yeroo inni lubbuun jiru fudhate gara qabeenya dhaalatti deebisu jechuu dha. Qabeenyi dhaalaa yommuu qulqulla’u qabeenyi jiru maal maal akka ta’ee fi eenyu harkatti akka argamu kan adda bahuu yommuu ta’u kana keessaa tokko qabeenya bifa kennaatiin dhaalchisaan dursee fudhatee dha. Sirni dhaaltuun qabeenya osoo dhaalchisaan lubbuun jiruu fudhate gara qabeenya dhaalatti ittiin deebi’ee makamu qabeenya dhaalatti makuu jedhamee waamama. Akkaataa kanaan qabeenyichi dursee dhaaltuudhaan fudhatame qabeenya dhaalaatti erga makamee booda dhaaltuun kun qabeenya dhaalaa hunda dhaaltota biroo waliin akka qooddatu ni taasifama jechuu dha. (Seera Hariiroo Hawaasaa keewwata 1065)

Du’aan yeroo lubbuun jiru kennaa gosa lama taasisuu akka danda’u ni beekama. Isaanis kennaa osoo inni lubbuun jiruu raawwatiinsa qabaatuu fi kan erga inni du’ee booda hojiirra ooluu dha. Kennaalee lamaan keessaa qabeenya dhaalaatti akka deebi’u kan taasifamu kennaa isa jalqabaa akka ta’e hubachuun barbaachisaa dha. 

𝗞𝗔𝗔𝗬𝗬𝗢𝗢 𝗜𝗦𝗔𝗔

Kaayyoo guddaan dhaaltota gidduutti garaagarummaan gahee akka hin uumamnee fi hanga danda’ametti qabeenya du’aa qixa akka qooddatan dandeessisuu fi walitti dhufeenyi maatii gidduutti jiraachuu qabu gaarii ta’ee akka itti fufu taasisuu dha. Dhaaltuun qabeenya biro bifa kennaatiin dursee fudhate qabeenya kana dhaalatti osoo hin makin qabeenya biroo deebi’ee dhaaltota biroo waliin kan qooddatu yoo ta’e hanga argachuu qaban irratti adda addummaan ni bal’ata. Seerichi kun akka ta’u waan hin barbaadneef sirni dhaalatti makuu akka diriiru taasisee jira. 

𝗛𝗔𝗔𝗟𝗔 𝗜𝗧𝗧𝗜 𝗥𝗔𝗔𝗪𝗪𝗔𝗧𝗔𝗠𝗨

Tumaa Seera Hariiroo Hawaasaa keewwata 1065 irraa akka hubatamutti dhaaltuun qabeenya dhaalaatti akka maku dirqamu qabeenyicha deebisee kan maku osoo hin taane tilmaama (gatii) qabeenyi sun baasuu danda’uu dha. Kanaaf, haalli raawwatiinsa isaa qabeenyi dhaaltuun yeroo dhaalchisaan lubbuun ture sun erga shallagamee booda gatiin isaa qabeenya dhaalatti kan makamu ta’a jechuu dha.  

𝗡𝗔𝗠𝗔 𝗠𝗔𝗞𝗨𝗨𝗙 𝗛𝗜𝗡 𝗗𝗜𝗥𝗤𝗔𝗠𝗡𝗘 

Seera hariiroo hawaasaa keewwata 1073 jalatti akka tumametti namni dhaaltuu ta’e tokko dhaaltummaa du’aa fudhachuuf hayyamamaa yoo hin taane qabeenya dursee kennaadhan fudhate qabeenya dhaalatti deebisuuf kan dirqamu miti. 

Dhaddachi ijibbaataa MMWF galmee lakk. 191963 ta’e (jildii 25ffaa) irratti dhimma Godina Arsii Aanaa Heexosaa irraa ka’e ilaalchisee murtii dirqisiisaa kenneen iyyattootni qabeenya dhaalaa du’aa qooddachuuf osoo hin gaafatin qabiyyee dursanii kennaadhaan argatan dhaalatti akka deebisan jechuun murtiin dhaddacha ijibbaataa MMWO tiin kenname dogoggora bu’uura seeraa qaba jechuun diiguun murteessee jira. 

•••